Татар классигы Туфан Миңнуллиндың “Әлдермештән Әлмәндәр” әҫәре бихисап театр сәхнәләрендә ҡуйылған. Сибай дәүләт башҡорт драма театрының баш режиссеры Денис Нурғәлиндың был пьесаға тотоноуо бушҡа түгелдер. Заманы шундай: йәшәү менән үлем тураһында бөгөнгө көндә йышыраҡ уйлана башланыҡ. Ваҡиғалар юмор аша, шаярыу ҡатыш күрһәтелһә лә был лирик комедия тәрән фәлсәфәгә эйә.
Спектакль барышында фани донъяның төш кенә булыуын, ә бына баҡыйлыҡҡа эйә булыуҙың ана шул төшөңдә хазина табыуға бәрәбәр икәнен аңлайһың. Шуға ла был спектакль артыҡ моңайтмай, ҡайғыртмай ғына йәшәү көсө бирә, бөгөнгө болғаныш заманда оптимистик рух һәм ыңғай энергия уята.